Nabiyaamã -Wẽnd pʋʋsg la A tɩlgr be a yĩnga- vẽnegdame n wilgdẽ, tɩ tʋʋmã fãa yaa b sẽn get Anniy wã, la bʋ-kãngã yaa bũmb sẽn gũbg tʋʋmã fãa gill pʋgẽ, sẽn yaa tũudum yεla la tʋmd-n-taare, rẽnd ned ning sẽn wa n rɩka a tʋʋmã tɩ yaa nafa la a rata, a ka na n paame rẽnda nafã-kãngã bala, a ka tar yel-sõmde, la ned ning sẽn wa n rɩka a tʋʋmdã tɩ yaa Wẽnd la a rat n na n pẽnege, a paamda yel-sõmd a tʋʋmdẽ wã la rolbo, baa tɩ mikame tɩ yaa tʋʋm zaala, wala yũub la rɩɩbo. Rẽ poorẽ tɩ Nabiyaamã -Wẽnd pʋʋsg la A tɩlgr be a yĩnga- rɩk bilgri, n na n wilg Anniy wã vũun sẽn ta to-to ningã tʋʋmẽ wã, n lagem ne fãa zemsa taab yĩngr-yĩngrã, rẽnda a wilga ned ning sẽn wa n rɩka Anniy ne Yikrã la tẽngã basgo tɩ yaa Wẽnd yardã baoobo, rẽnd yẽ soab yikrã yaa yikr sari wã sẽn rate, tɩ yaa b sẽn reege, t'a na n paam yel-sõmdã a Anniyã sɩdgrã yĩngã, la ned ning sẽn wa n rɩka a yikrã tɩ yaa dũni nafa raab la arzεka la lohorem maa tolbo maa paga, rẽnd a ka na n paam a yikrã pʋgẽ sã n ka nafã-kãngã bala, a sẽn maana Anniy wã ne bũmb ningã, la a ka na n paam yel-sõma la rolbã ye.

Nabiyaamã, (Wẽnd pʋʋsg la A tɩlgr be a yĩngɑ) vẽnegdame n wilgdẽ, tɩ ned ning sẽn tʋg n wa ne bũmb dĩinã pʋgẽ, maa a tʋg n maana tʋʋmd tɩ daliil ka be a zugu, sẽn yi Alkʋrãanẽ wã maa Sunnah pʋgẽ, b na n lebs-a-la a soaba, ka na n reeg Wẽnd nengẽ ye.

A Ʋmar kõta kibare -Wẽnd yard be a yĩnga- t'a Gibriila, a puka Sahaabsẽ wã -Wẽnd yard be b yĩnga- t'a yaa sẽn rɩk rao naande, tɩ b ka mi-a ye, la a sɩfã yaa t'a fuugã yaa peell wʋsgo, t'a zoobdã yaa sabell wʋsgo, b ka ne sor tagmas a zug sẽn yaa yaamse, la wubsgu la zoobd zũndgr la futã rẽgd ye, ned baa a yembr ka mi-a zĩndbã pʋgẽ ye, tɩ bãmb zĩ Nabiyaamã nengẽ -Wẽnd pʋʋsg la A tɩlgr be a yĩnga- t'a zĩnd Nabiyaamã taoore, tɩ yaa karen-biig zĩndgu, n sok-a lɩslaangã yelle, tɩ Nabiyaamã loek-a ne zeng raad-kãensã sẽn kʋmde, reeg-f-zugẽ ne sahd a yiiubã la gũus wakat a nu wã, la kõ Zakã b rãmbã, la Ramadaanã no-loeerã maanego, la hagiimdã farilã maaneg ne tõogda. Tɩ soakdã yeele: «f togs sɩda». Tɩ sahaabsã maan yel-solemde, a sẽn sokd tɩ yaa a sẽn ka mi sokre, rẽ poorẽ t'a yaool n sɩdgd-a wã. Rẽ poorẽ t'a sok-a sɩd-kũunã yelle, t'a loek-a ne zeng raad-kãensã a yoobã, sẽn kʋmbde, kõ sɩd ne Wẽnde belmã, A Naam yɩ wagelle, la A sɩf-rãmbã la f leb n welg n kõ-A tʋʋm ning sẽn yaa Yẽ tʋʋma, wala naanegã, la f leb n welg n kõ-A tũudumã, la f kõ sɩda tɩ malεgsã b naan-b lame ne nuura, tɩ b yaa yembs b sẽn waooge, b ka kɩɩsd Wẽnde, A Naam yɩ wagell n zẽke, la yaa Wẽnd sagellã la b tʋmda, la f kõ sɩda ne gaf-rãmb nins sẽn sig tẽn-tʋʋmbã zugã, sẽn yi Wẽnd nengẽ wã, A Naam yɩ wagelle, wala Alkʋrãanã la Tawraatã la Lingiilã la sẽn wõnd rẽ, la kõ sɩd ne tẽn-tʋʋmb nins sẽn taasd dĩinã Wẽnd yĩngã, sẽn be b pʋgẽ yaa a Nuuhu, la a ɭbraahɩɩma, la a Muusa la a ɭɩsa la b baasdgã yaa a Mohammade, -Wẽnd pʋʋsg la A tɩlgr be a yĩnga- la zẽng sẽn ka bãmba sẽn yaa nabiyaam-rãmb la tẽn-tʋʋmbã, la kõ sɩd ne yaoolem raarã la yεl nins sẽn be kũumã poorẽ wã, kẽeda yẽnda pʋgẽ, sẽn yaa kabr nango la vɩɩm ning sẽn be yaadẽ wã, la f kõ sɩd tɩ ninsaalã b yikd-a lame kũumã poorẽ, n geel a tʋʋmã, t'a kẽngr zĩigẽ, arzãnã maa Bugmẽ. La kõ sɩd tɩ Wẽnd korda yεlã n zems wala Wẽnd bãngrã sẽn dag n reng taoor tɩ na n yɩɩme wã, la A sẽn gʋls rẽndã la A tʋlsmã, la a sẽn na yɩ wala A sẽn kord-a to-to ningã. Rẽ poorẽ t'a sok-a manegrã yelle, tɩ Nabiyaamã kõ-a kibar tɩ ad manegre, yaa fo tũ Wẽnde, tɩ yaa wala fo ne-A lame, rẽnd f sã n ka paam sor n na n ta dargε-kãngã bɩ f tũ tɩ yaa wala Wẽnd nee foom, rẽnd rẽenem yaa seedg la ges dargε, ning f yamẽ tɩ yaa wala fo nee Wẽndã, yẽnda la rẽenem dargε, yẽ me n leb n zẽk n yɩɩda, yiib soaba yaa gũus Wẽndã dargε sẽn ta zĩig ninga. Rẽ poorẽ t'a sok-a dũni wã yikr yaa rabʋre? Tɩ Nabiyaamã -Wẽnd pʋʋsg la A tɩlgr be a yĩnga- vẽneg n wilg tɩ ad dũni wã yikri yaa bũmb ning Wẽnd sẽn bas a bãngrã A nangẽ, rẽnd bon-naandg baa a yembr ka mi-a ye, b sẽn sokd a soabã la soakdã meng me ka mi ye. Rẽ poorẽ t'a sok-a dũni wã yikr tagmas-rãmbã? Tɩ Nɑbiyɑɑmã vẽneg n wilgi -Wẽnd pʋʋsg la A tɩlgr be a yĩnga- tɩ sẽn be ɑ tɑgmes-rãmbã pʋgẽ yɑɑ yem-pogs wʋsgre lɑ b koɑmbã. mɑɑ koɑmbã sẽn nɑmsd b mɑ-rãmbã sẽn nɑ n wʋsge, tɩ b tʋmd ne b mɑ-rãmbã wɑlɑ yem-pogse, tɩ lɑ rũm-kɩɩmbã lɑ tɑlsã b nɑ n wɑ lebgɑ arzεgs rãmbɑ zãmɑɑn yɑoog wɑkɑto, tɩ b pugd tɑɑbɑ ne rot nɑgsgo lɑ b tombo (meebo). Rẽ poorẽ Nabiyaamã -Wẽnd pʋʋsg la A tɩlgr be a yĩnga- kõ kibare tɩ ad sokdã yaa a Gibriila, a waame n na n wilg sahaabsã dĩin-kãngã sẽn yaa tẽeg tɩrg dĩinã.

Nabiyaamã (Wẽnd pʋʋsg la A tɩlgr be a yĩngɑ) wõnesa lɩslaangã ne meoongo sẽn me n mɑneg ne ɑ zeng-raad a nu wã, tɩ yɑɑ bãmb n tʋk-ɑ; tɩ lɩslɑɑngã yεl sẽn kellã fãɑ, yaa sẽn na n pids n lok meoong-kãngã, La zeng raad-kãensã rẽenem: yaa sahd a yiibã; tɩ soɑb sẽn na n tũ n tɩlg ka be rẽnda Wẽnde, la a Mʋhammad me yaa Wẽnd Tẽn-tʋʋma, bãmbã yaa zeng raoog a yembre, b yiibã ka welgd n bas taab ye; yamb yeta b yiibã n reeg a zugu ne Wẽnd yemblemã la Wẽnd sẽn sõmb ne tũudmã, A Yembr Tãa, pɑ zẽng sẽn ka Yẽ ye, la a tʋm ne b yiibã sẽn ratã, la a kõ sɩd ne a Mʋhammad tẽn-tʋmdlemã, (Wẽnd pʋʋsg la A tɩlgr be a yĩngɑ). Zeng raoog a yiibã: yaa Pʋʋsgã yalsgo, yẽ me la Pʋʋsg a nu wã sẽn yaa tɩlae wã, yʋng la wĩndga, Fagiri, Zafare, Laasare, Magrib la Sãanfo, ne b sart-rãmbã la b zeng-raad nins sẽn yaa tɩlae wã. Zeng raoog a tãab soaba: yaa Zakã yãkr sẽn yaa tɩlae wã, la yẽ yaa tũudum ne arzεka, lidg fãa sẽn tɑ alkadr b sẽn yãk toaaga, sãri wã pʋgẽ tɩ b miẽ, tɩ b yãkd n kõt neb nins sẽn sõmbã ne-ɑ wã. Zeng-raoog a naas soaba: yaa hagiimdu, lɑ yẽ yaa togl Makã, n tʋg n maan tũudum tʋʋma, Wẽnd tũudum yĩnga, (A Naam yɩ wagell n zẽke). Zeng raoog a nu soaba: yaa Ramadaanã no-loeere, yẽ me yaa: yõk-m-meng n yi rɩɩbo, la yũubu, lɑ zẽng sẽn ka b yiibã sẽn yaa yεl nins sẽn kaood noorã, n lɑgem ne Anniy rɩkre tɩ yɑɑ Wẽnd tũudum, sẽn na n sɩng Fagir pukri n tʋg n tãag wĩndgã lʋɩɩse.

Nabiyaamã, Wẽnd pʋʋsg la A tɩlgr be a yĩnga, vẽnegdame n wilgdẽ, Wẽnd hakε wã sẽn be yembsã zugu, la yembsã hakε sẽn be Wẽnd zugu, n wilgdẽ tɩ ad Wẽnd hakε wã sẽn be yembsã zugu, yaa b tũ-A A Yembr tãa, n ka maan lagem-n-taar ne-A Baa fʋɩ ye, La tɩ ad yembsã hakε sẽn zao Wẽnde, yaa A ra wa tʋg n sɩbg neb nins sẽn yaa Wẽn-yembdbã, sẽn ka maand-b lagem-n-taar ne-A wã. Rẽ poorẽ, a Mu’aaz yeelame : « Wẽnd Tẽn-tʋʋma, rẽ yĩnga, m ka na n kõ nebã kiba-noogo, sẽn na yɩlẽ tɩ b kɩdme la b noog b sũur ne Wẽnd kũun-kãnga » ? Tɩ Nabiyaamã -Wẽnd pʋʋsg la A tɩlgr be a yĩnga- gɩdge, a sẽn yεεsd tɩ b na n wa teeg rẽndã.

A Mʋ'ʿaaz ɭbn Gεbal rag n yɩɩme, (Wẽnd yard be a yĩnga), n zao Nɑbiyɑɑmã poorẽ (Wẽnd pʋʋsg la A tɩlgr be a yĩnga), a rũngã zugu, t'a bool-a n yeele, yaa a Mʋ'ʿaaze, la a yɩlma a boollã noor a tãabo, tɩ yaa sẽn na n keng bũmb ning a sẽn na n yeelã sẽn ta zĩig ninga. La rẽ fãa, a Mʋ'ʿaaz -Wẽnd yard be a yĩnga, rag n sakdame, n yetẽ: «labbayka yaa rasʋʋlʋllaah wa sa'ʿadayka», rat n yeele: m sak-fo, Wẽnd Tẽn-tʋʋma, (Wẽnd pʋʋsg la A tɩlgr be a yĩnga), m sok f yĩnga, tɩ yaa sakr sẽn pʋgd taaba, m leb n baooda zu-noogo fo sakrã yĩnga. Tɩ Nɑbiyɑɑmã (Wẽnd pʋʋsg la A tɩlgr be a yĩnga) kõ-a kibare, tɩ ad ned ka be n na n maan kaseto tɩ (laa ɩlaaha ɩllal-Allaah= soab sẽn na n tũ n tɩlg ka be, rẽnda Wẽnde), la (Mʋhammadan rasʋʋllaah= la a Mohammad yaa Wẽnd Tẽn-tʋʋmã) tɩ yaa sɩda a sũurẽ wã, n ka zĩri-beedo, a sã n maan kaalem halhaal-kãngã zugu, Wẽnd haramda Bugmã a yĩnga. T'a Mʋ'ʿaaz (Wẽnd yard be a yĩnga) sok Nɑbiyɑɑmã (Wẽnd pʋʋsg la A tɩlgr be a yĩnga) t'a na n togsa nebã tɩ b sũyã yɩ noogo la b kɩdem ne yel-sõmdã? Tɩ Nɑbiyɑɑmã yεεse (Wẽnd pʋʋsg la A tɩlgr be a yĩnga) tɩ nebã na n wa teega rẽndã tɩ b tʋʋmã yɩ bilfu. T'a Mʋ'ʿaaz ka yẽs ned baa a yembre, sã n ka a kũumã sẽn wa n ta wã, a sẽn yεεsd tɩ yẽ na n wa tʋg n lʋɩɩ bãngr solgr zũnuub pʋgẽ.

Nɑbiyɑɑmã (Wẽnd pʋʋsg la A tɩlgr be a yĩnga) kõta kibare, tɩ ned ning sẽn yeela la a maan kaset ne a zelemde, tɩ Laa'ɩlaaha ɭllallaah, rat n yeele: bũmb tũudg sɩd ka be rẽnda Wẽnde, la a kɩfl b sẽn tũud zẽng tɩ ka Wẽnde, la a zãag a meng n yi dĩin-rãmbã tɩ sã n ka lɩslaango, wakat-kãngã a arzεkã la a zɩɩmã lebga haraam ne lɩslaambã, rẽnd bũmb ka be ne tõnd sã n ka ninsaal tʋʋmã sẽn vẽnegã, rẽnd f ka tõe n reeg a arzεka, ka tõe n wɩdm a zɩɩm t'a ka lɩslaam ye, sã n ka wa n mikame t'a maana yel-beedo, maa a kʋʋ neda, tɩ yaa tɩlae tɩ b maan-a woto, n zems ne lɩslaangã bʋʋdã. La Wẽnd n na n ges a geelgã dũni yikr raare, sã n mikame t'a yaa sɩd soaba, A rond-a lame, la sã n mik tɩ yaa munaafɩka A sɩbgd-a lame.

Raoa n sok Nabiyaamã, Wẽnd pʋʋsg la A tɩlgr be a yĩnga, yell sõmbs a yiibã, sẽn maan tɩ ned kẽ arzãnã, la sẽn maan tɩ ned kẽ Bugmã ? T’a loek-a, Wẽnd pʋʋsg la A tɩlgr be a yĩnga, tɩ yell ninga sẽn kẽesd a soaba arzãnã tɩlae wã, yaa ninsaal sẽn na n maan kaalem, t’a yaa sẽn tũud Wẽnde, A Yembre, n ka maan lagem-n-taar ne-A baa fʋɩ ye, la ad yell ninga sẽn maan tɩlae n kẽes a soab Bugmẽ wã, yaa ninsaal sẽn na n ki t’a yaa sẽn maan lagem-n-taar ne Wẽnde, n maand gees-n-taaga la bils-n-taare ne Wẽnde, A tũudmã wεεngẽ, la A Wẽndlmã wεεngẽ, maa yaa A yʋɩyã wεεngẽ, maa yaa A sɩf-rãmbã wεεngẽ.

Nabiyaamã (Wẽnd pʋʋsg la A tɩlgr be a yĩngɑ) kõta kibare, tɩ ned ning sẽn wa n rɩka tũudum ning sẽn yaa tɩlae ne Wẽndã, n rogl zẽng sẽn ka Wẽnde, wala kos zẽng tɩ ka Wẽnde, maa bao fãagr ne zẽng sẽn ka Wẽnde, n tʋg n maan kaalem rẽ zugu, ad a yɩta Bugum koambã a yembre. La a ɭbn mas'ʋʋd paasame (Wẽnd yard be a yĩnga) n yeele, tɩ ned ning sẽn maana kaalem t'a soabã ka maan lagem-n-taar ne Wẽnde, baa fʋɩ, a baasg zĩig yɩta arzãna.

Wɑkɑt ning Nɑbiyɑɑmã (Wẽnd pʋʋsg la A tɩlgr be a yĩnga) sẽn wɑ n tʋm ɑ Mʋ'ɑɑz ɩbn Gεbɑl -Wẽnd yɑrd be a yĩngɑ- t'ɑ kẽng Yɑmɑn zãmɑɑnɑ, n tʋg n bool-b n tʋg Wẽnd dĩinɑ, lɑ ɑ yɩ b kɑren-saɑmbɑ, Nɑbiyɑɑmã vẽnegɑme n wilg-ɑ t'ɑ nɑ n yekɑ neb sẽn yɑɑ Nɑsɑɑr-dãmbɑ; sẽn nɑ yɩl t'ɑ soglg b yĩngɑ, rẽ poorẽ mɑsɑ bɩ ɑ sɩng ɑ sẽn nɑ n bool-ba bũmb ning sẽn pɑk n to yɩɩdã, n yɑool n ges sẽn pʋgdã, Rẽnd ɑ boond-b lɑme n tʋg Loεεgã mɑnegre nɑnɑndɑ; tɩ b mɑɑn kɑset tɩ soɑb sẽn nɑ n tũ n tɩlg kɑ be rẽndɑ Wẽnde, lɑ ɑ Mʋhɑmmɑd yɑɑ Wẽnd Tẽn-tʋʋmɑ; bɑlɑ b kẽedɑ Lɩslɑoongã ne Gom-bi-kãngã, tɩ b sã n sɑk n tũ rẽ ɑ yet-b lɑme tɩ b pʋʋse; bɑlɑ Pʋʋsgã n yɩɩd wɑɑgib-rãmbɑ fãɑ Wẽnd-yembgã poorẽ, tɩ b sã n mɑɑn rẽ, ɑ sɑgendɑ b rɑkãɑgbã tɩ b yiis b ɑrzεkã zɑk n kõ b tɑlsã, rẽ poorẽ ɑ bugs-ɑ lɑme t'ɑ rɑ reeg b ɑrzεkã sẽn tʋg n yɑɑ sõmɑ n yɩɩdɑ ye; bɑlɑ sẽn zɑo b zugã yɑɑ tẽng-n-sʋgrã, Rẽ poorẽ t'ɑ sɑgl-ɑ t'ɑ zãag wẽgbã; sẽn nɑ yɩl tɩ b sẽn wẽg ɑ soɑbã rɑ kãɑb-ɑ ye, bɑlɑ ɑ kosgã reegdɑme

Nɑbiyɑɑmã(Wẽnd pʋʋsg la A tɩlgr be a yĩnga) kõtɑ kibɑr tɩ nebã sẽn yɩɩd ne zunoogo n nɑ n pɑɑm yẽ sugsgã dũni yikr rɑɑrã yɑɑ ned ning sẽn yeelɑ: " soɑb kɑe rẽndɑ Wẽnde t'ɑ yɑɑ sẽn mɑɑn pʋ-peelem ne gomdã ɑ sũurẽ wã" rɑt n yeel tɩ soɑbɑ b sẽn tũud ne sɩd kɑ be rẽndɑ Wẽnde, lɑ ɑ leb n tɩlg n yi lɑgm-n-tɑɑre lɑ mɑɑn-tɩ-b-yã.

Nɑbiyɑɑmã (Wẽnd pʋʋsg la A tɩlgr be a yĩnga) kõta kibare, tɩ lɩɩmaoongã a yaa kõbg wʋsgo, a gũbga tʋʋmã la loeese la goama. Tɩ lɩɩmaoongã yel-weendɩ wã sẽn tʋg n zẽk n yɩɩda, la a sẽn tʋg n yɩɩd ne yel-sõmde, yaa «Laa'ɩlaaha ɭllallaah» yeelgo, n mi a maanã wã, n tʋm wala a sẽn ratã, tɩ Wẽnde, Yẽ la Soaba, n yaa Yembr tãa, sẽn sõmb ne tũudum, zẽng sẽn ka Yẽndã fãa ka sõmb ne-a. La tɩ sɩd-kũunã tʋʋm sẽn tʋg n paood n yɩɩda, yaa fo rɩk bũmb ninga sẽn namsd nebã n yi b soy wã. Rẽ poorẽ tɩ Nɑbiyɑɑmã (Wẽnd pʋʋsg la A tɩlgr be a yĩnga) kõ kibare, tɩ ad yãn-zoεεgã, a bee lɩɩmaoongã yel-welds pʋgẽ, tɩ ad yãn-zoεεga yaa zʋgd sẽn kɩt t'a soaba maan tʋʋm sõmbse la a bas tʋʋm wẽnse.